روايه كامله 2
ازاي حققت رغبة جوزي ف الطلاق بعد 5 سنين تهديد؟؟
تقول صاحبة القصة:
أتجوزت من 8 سنين.. أخر 5 سنين ف جوزانا.. جوزي استخدم التهديد بالطلاق كرد فعل على أي وكل حاجة.. العشا اتحرق.. يقولي "هتصل بمحامي الطلاق".. نسيت أجيب الهدوم من عند المكوجي.. يقولي "المفروض ننفصل".. اختلف معاه ف اللون اللي هنعمله لسيراميك الحمام.. يقولي "الجوازه دي مش نافعه"..
ف البداية كلامه ده كان بيدمرني.. كنت بعيط.. واتحايل واعتذر على أيًا كان اللي خلاه يقول الكلام ده.. بس عشان يرجع ف كلامه.. ساعتها بتظهر على وشه نظرة رضا ويقولي "هديكي فرصة تانية".. وكنت بحس إني فعلا محتاجه أحاول أكتر..
بعد كده بقى ده نمط سلوكه معايا ف أي مرة اعترض على أي حاجة هو عايزها.. ورده دايمًا "خلينا بقى نمشي ف إجراءات الطلاق"..
عايزه ازور اختي عشان عيد ميلادها.. تهديد بالطلاق.. شايفه إننا لازم نوفر فلوس بدل ما نشتري تالت بلايستيشن.. تهديد بالطلاق.. اطلب منه يساعد ف شغل البيت.. تهديد بالطلاق..
أسوء حاجة إنه كان بيتكلم بطريقة طبيعية وتلقائية جدًا وكأنه بيقترح عليا إننا نطلب بيتزا.. مفيش أي انفعال أو مشاعر ف كلامه.. وكأن الجوازه فعلًا انتهت.. وبعدين يستناني ارجع ف كلامي واعمل له اللي هو عايزه..
صاحبتي إيما شهدت مرة على واحد من تهديداته.. لما قولت له إني مش عايزه اروح الحفلة اللي عاملها مديره
هو فورًا قال "لو انتي مش قادرة تدعمي مستقبلي المهني.. يمكن احنا محتاجين نعيد تفكير ف العلاقة دي".. الكلام ده كان قدام إيما صاحبتي.. واللي اتصدمت وأنا قولت "ماشي أيًا يكن.." وروحت الحفلة الغبية معاه وأنا حاسه دماغي هتتقسم نصين لأن ده اللي أنا كنت بعمله دايمًا..
حتى إنه هو بدأ يهدد على أتفه الحاجات.. أشتريت النوع اللي مش متعودين عليه من اللبن وساعتها قال "عشان كده الطلاق بيحصل.. لأن الناس مش بتسمع"..
سبت النور منور وهو ساعتها قال "الناس الكويسه بيتجوزوا جوازات مهببه.. اعتقد إني محتاج أدور على حد تاني"..
بس نفس الثانية اللي بقوله فيها بجد "ماشي.. خلينا نتكلم عن الطلاق".. بيرجع ف كلامه فورًا ويقول "بطلي تكبري الموضوع.. أنا بس بعبر عن إحباطي.. انتي ليه نكديه كده؟"
الشهر اللي فات كان عيد جوازنا.. قضيت اليوم كله بطبخ الأكل اللي بيحبه.. برتب الشمع عشان أخلي كل حاجة مميزه.. يومها رجع البيت متأخر جدا بدون ما يعتذر ولما سألته "اتأخرت ليه؟"
كان رده "كنت بسأل نفسي إذا كنت عايز ارجع البيت لواحده متطلبه زيك.. شكلنا كده محتاجين ننهي كل حاجة".. قال كده ف عيد جوازنا.. ف أم عيد جوازنا.. يومها روحت للسرير وموقفتش حتى اتناقش معاه..
من 3 أسابيع بس كل حاجة اتغيرت.. كنا بنتخانق عشان هو نسي تمامًا عيد ميلادي.. متعبش نفسه حتى
قولت له "أوك"
ضحك ورد عليا "متبقيش عبيطه.. انتي عارفه إني مقصدش"
ف قولت له "لا.. انا موافقه إحنا لازم نتطلق"
أسلوبه كله اتغير وبدأ يتراجع وقال "انا بس متوتر ومقصدش حاجة"
رديت عليه وقولت "بس أنا اكتفيت.."
ف نفس الأسبوع وكلت محامي وبدأ يفصل ف الممتلكات بتاعتنا.. ودورت على شقة وأجرتها.. عملت كل حاجة بهدوء.. وهو مكمل وعايش حياته وهو فاكر إن لعبة التهديد بتاعته لسه شغاله وبتأثر فيا..
لدرجة إنه كمل وفضل يهددني بالطلاق كل شوية خلال ال3 أسابيع دول.. بسبب الغسيل.. بسبب الخضار اللي اشتريته.. وكل مرة أقوله "انت صح.. نتطلق".. ف يضحك بسخرية وكأنه كسبني..
امبارح الصبح صحي لقاني بحط حاجتي ف صناديق.. سألني "بتعملي ايه؟"
قولت له "بلم حاجتي عشان همشي من البيت"
ضحك وقال "بطلي نكد بقى.. ايه اللي حصل أصلًا؟"
اديته ف ايده نسخ من ورق الطلاق.. اللي وقعت عليه أنا والمحامي.. وفيه مواعيد القضية ف المحكمة وكل حاجة.. وشه اتحول من نظرة السخرية والغرور.. للحيرة.. للرعب ف حوالي 3 ثواني..
بدأ يتهته ويقول "ايه الجنان ده.. أي مشكلة ممكن نحلها.. انا عمري ما كنت عايز اطلقك"
ساعتها مسكت تليفوني وشغلت له أكتر من تسجيل حسب نصيحة المحامي.. 17 تسجيل.. بـ 17 تهديد بالطلاق خلال
قولت له "3 يناير.. كنت عايز تطلق عشان أنا اشتريت عيش أبيض.. 5 يناير كنت عايز تطلق عشان لبست فستاني الأحمر اللي انت مش بتحبه.. 8 يناير كنت عايز تطلق عشان عطست وانت بتتفرج على البرنامج اللي بتحبه.. وهكذا وهكذا.."
فضل يتحايل عليا ويقول إنه دي طريقته ف التعبير عن نفسه وإنه عمره ما قصد أي حاجة من دي.. قولت له "انت هددتني بالطلاق حوالي 300 مرة ف 5 سنين.. انا بس بديك اللي انت عايزه"
ساعتها بدأ يعيط وقال "انتي العالم كله بالنسبالي.. انا مقدرش أعيش من غيرك"
قولت له "سبحان الله.. ده انت امبارح بس كنت عايز تطلقني عشان أنا طبقت القميص بتاعك بطريقة معجبتكش"
حاول يقطع الورق بتاع الطلاق اللي سلمتهوله.. وكأن ده هيلغي الإجراءات اللي حصلت.. قولت له "دول أصلًا نسخ.. الأصول اتقدمت ف المحكمة.. انت كنت عايز تطلق كل مرة بتحصل حاجة مش على مزاجك.. اهو دلوقتي الطلاق وعلى مزاجك.. مبروك.. هنتطلق"
فضل يمشي ورايا لساعات.. حبه يتحايل وحبه يتعصب.. وهو بيقول "انتي بترمي جوازنا وحياتنا على والا حاجة"
قولت له "لا.. انت اللي رميت جوازنا وحياتنا بسبب اللبن والقمصان وكل حاجة حاجة تافهه تانية هددتني بسببها.. انا بس بنهي اللي انت بدأته 300 مرة.. انا همشي من البيت ده انهارده ومش راجعه تاني"
بعد ما مشيت بعت لي 40 رسالة بيقولي فيها اد ايه هو اتغير وإنه عمره
