بتحبي الورد
بتحبي الورد
اه بحب الورد.
طب خدي وردة جميلة زيك اهي.
أنت بتعاكسني
لا ماما قالتلي إن الولاد اللي بيعاكسوا بنات وحشين اوي اوي.
يا قلب ماما طب روح بقي لماما قولها إنك وحش
ده إيه البلاوي دي.
مش هعرف أروحلها علشان ماما راحت عند ربنا.
ورميت الورد اللي في إيدي وقعدت جمب باب المستشفي وفضلت أعيط.
أيمن ! أنت بتعيط يا حبيبي.
أيوة أيمن زعلان أوي.
مين اللي زعلك!
شاورت علي البنت اللي زعلتني وقلت هي دي يا طنط منال.
بتزعليه ليه يا آنسة
والله مازعلته حضرتك مش شايفاه كبير ازاي وجاي يرمي بلاه ويرخم عليا
لا كذابة يا طنط منال زعلتني وقالتلي روح لماما وإني زي الشباب الوحشة اللي بتعاكس البنات.
لا يا حبيبي أنت مش وحش هي اللي وحشة.
وأنا في طريقي علشان أروح سمعتها بتتكلم مع طنط منال
هو بيتكلم كدة ليه يا أستاذة منال
معلش يابنتي أعذريه والدة أيمن كانت هنا في المستشفي من سنة وماتت من ساعتها دخل في صدمة عصبية وبيفكر بعقل طفل لسه عنده ٩ سنين وهو زرع ورد عنده في البيت علشان مامته كانت بتحب الورد وكل مايشوف بنت جميلة يديها ورد ويقولها ادعي لماما.
ده بجد
هكدب
طب ليه مارحش لدكاترة واتعالج
الصدمة العصبية مش سهلة زي ما انتي متخيلة مع الوقت هيرجع زي الأول بإذن الله.
مافهمتش حاجة من كلامهم وقتها بس كنت عاوز اروح بسرعة علشان الورد زمانه عطشان ولو مات ماما هتزعل مني.
أخدت تاني يوم ورد أبيض وحلو كدة ورحت للمستشفي علشان واحدة قالتلي لو ماما راحت عند ربنا ادي الناس حاجات وخليهم يدعولها علشان تشوف مامتك فرحانة وبتضحك.
شوفتها واقفة قدام باب المستشفي وعملت نفسي مش شايفها علشان مخاصمها ومش هديها ورد.
أنا مستنياك من الفجر.
لا أمشي أنا مخاصمك.
علي فكرة عندي ورد كتير وممكن اديهولك تديه للناس الحلوة وتخليهم يدعو لماما!
بجد
أيوة بجد طب تعرف إني دعيت لماما كتير اوي امبارح وهي دلوقتي فرحانة
أيوة ماما فرحانة اوي اوي بس فرحانة علشان انا مش وحش وبعاكس بنات.
ياااه أنت لسه فاكر خلاص بقي.
طب فين الورد
عند ماما في البيت بيتنا مش بعيد من هنا.
طب روحي هاتيهم وانا هدي الناس الورد وهستناكي.
لا تعالي معايا علشان ماما مش هترضي تديهملي.
رجعت لورا خطوتين
لا أنتي عاوزة تخطفيني.
لا والله مش هخطفك.
بجد
والله بجد.
افتكري إنك حلفتي والكداب بيروح النار.
أيوة بيروح النار يلا بقي
يلا.
وإحنا في الطريق.
معاك بطاقة
أيوة معايا بطاقة بابا قالي مامشيش من غيرها علشان البوليس يحميني.
طب وريهالي كدة.
أتفضلي.
مسكت البطاقة وفضلت تقرأ وتقريبا عينيها دمعت.
أنت عندك كام سنة يا أيمن
حطيت خمسة في مخي وأربعة
علي إيدي وقولتلها تسع سنين.
بس اللي قدامي غير كدة قدامي إنك ٢٣ سنة.
لا عندي تسعة.
ليك صحاب طيب
لا كل ما اجي العب مع العيال كورة يقولولي العبيط أهو ويضربوني بس بابا بيشتمهم ومابقاش يخليني العب معاهم.
اه.
أنتي بتعيطي يا أستاذة
لا عيني وجعاني بس علشان مانمتش كويس.
طب انتي اسمك ايه
اسمي فاطمة.
وأنا أيمن ممكن تبقي صاحبتي يا فاطمة!
أيوة أكيد.
ابتسمت وفرحت من جوايا علشان فاطمة مش وحشة وقالتلي لا زي ما الباقي بيعمل معايا.
بيتنا أهو وصلنا.
البيت كان كبير وقدامه جنينة كلها ورد رحت مسقف ب إيدي وقلت ماما هتفرح اوي اوي يا فاطمة.
ازيك يا ماما.
نهارك مش فايت ماشية مع واحد أكبر منك في الشارع وجيباه معاكي وجاية
استني بس هفهمك.
وفضلت ربع ساعة تتكلم
أيمن تعالي سلم علي ماما.
ازيك يا ماما فاطمة.
ازيك يا حبيبي أنت بيتك فين.
بدأت احرك عيني يمين وشمال وأفكر
بصي جمب المستشفي بتاع ماما فيه مطعم بمشي بعد المطعم شارع وشارع وشارع وبعد كدة بروح بيتنا عند عمو علي الطيب بتاع الأيس كريم.
طب أنت أكلت النهاردة
بصيت في الأرض وبدأت أخاف
أقولك بس ماتقوليش لبابا
لا مش هقوله.
هو قالي كل قبل ما تنزل فأخدت الساندوتش بتاعي وكان فيه لانشون كتير وانا نازل باكله لاقيت قطة وجمبها ولادها فضلت العب معاهم واديتهم الأكل كله علشان صغيرين وعاوزهم يكبروا.
يا حبيبي طب تعالي ناكل مع بعض.
لا ماما قالتلي ماتاكلش عند حد غريب.
أنا مش غريبة أنا زي ماما تعالي بس.
بصيت لفاطمة راحت ضاحكة بوشها الجميل وهزت رأسها وقالت يلا.
بيت فاطمة حلو اوي فيه قطة لونها أبيض اسمها روز قديم زي بيت جدو بس فيه روح حلوة وراديو شغال علي صوت حلو وواحدة بتقول أنت عمري اللي ابتدي بنورك صباحه.
خلصنا الأكل وأخدنا ورد كتير اوي اوي وأديته انا وفاطمة للناس الجميلة وخليناهم يدعوا لماما.
بس عمري ما أنسي لما فاطمة قالتلي في آخر اليوم إنها حبت ماما ساعتها حبيت فاطمة الجميلة
