مواجهه عائليه

​آدم وطى لمستوى ياسين، وشاله على كتافه قدام الكل وقال بصوت عالي: "ياسين مش تذكير بفشل حد.. ياسين هو اللي سند البيت ده وهو ميعرفش، وهو من النهاردة ابني، واللي هيفكر يرميه بنظرة مش عاجباه، ينسى إن له بنت اسمها مريم أو حفيد اسمه ياسين."
​بصلي آدم ومدلي إيده، وفي عينيه نظرة طمنتني إن الدنيا لسه بخير. مسكت إيده وأنا حاسة إن جبل انزاح من على صدري. بصيت لأهلي لقيتهم واقفين زي التماثيل، مش بس عشان السر اتكشف، لا.. عشان عرفوا إن القوة اللي كانوا بيذلوني بيها، كانت من خيري أنا.
​لفيت وشي للمعازيم وقلت بكل ثقة: "المراسم هتبدأ دلوقتي.. اللي حابب يفرح معانا يتفضل، واللي شايف إن وجود ابني بيضايقه، الباب يفوت جمل."
​ياسين ضحك وهو فوق

كتف آدم، وفي اللحظة دي عرفت إن دي مش مجرد بداية جواز، دي كانت بداية حياتي الحقيقية.
أبويا لف وشه الناحية التانية مش قادر يحط عينه في عيني، وأمي كانت بتبص لكراسي المعازيم وهي شايفة نظرات الاحتقار في عيون صحابهم وقرايبهم. القناع اللي عاشوا بيه سنين، قناع العيلة المثالية "والبنت الضالة"، وقع واتفرفط قدام الكل.
​آدم مسبش إيدي، ومال على ودني وهمس: "جاهزة؟"
حكايات صافي هاني 
هزيت راسي وأنا كاتمة دموعي، بس المرة دي كانت دموع نصر مش دموع قهر.
​المأذون بدأ يكتب الكتاب، وكل كلمة "بارك الله لكما" كانت بتنزل على قلبي زي البلسم، وفي نفس الوقت كانت زي الرصاص في قلب كل واحد حاول يكسرني. ياسين كان قاعد في حضن آدم، بيلعب بوردة من بوكيه الورد بتاعي، وهو مش فاهم إن الراجل اللي شايله ده لسه مغير مجرى حياته كلها.
​بعد ما خلصنا، آدم وقف ومسك الميكروفون، والصمت رجع تاني للقاعة:
حكايات صافي هاني 
"أنا النهاردة مخدتش مريم بس.. أنا النهاردة بقيت أب لياسين، ومن اللحظة دي أي مليم مريم كانت بتبعتوا للبيت ده هيتوقف، مش بخل، بس عشان الفلوس اللي متمسحش دمعة طفل وتصون كرامة أمه، متستاهلش تروح لناس مبيعرفوش يعني إيه أصل."
​أخواتي حاولوا يلموا الليلة ويتكلموا، بس آدم أشار للامن بتوع القاعة إنهم يخرجوهم بهدوء. خرجوا وهما بيجروا أذيال الخيبة، والناس اللي كانت جاية "تتفرج" علينا، وقفت تسقف بجد، وكأنهم كانوا مستنيين حد يكسر دايرة الظلم دي.
حكايات صافي هاني 
​قضينا الليلة بنضحك وبنرقص، وياسين كان طاير من الفرحة وهو شايف الكل بيحتفل بيه. لأول مرة أحس إن الفستان الأبيض ده مش مجرد لبس، ده كفن لكل الوجع اللي عشته، وتوب جديد لحياة هعيشها بكرامتي.
​لما ركبنا العربية في آخر الليل، آدم بصلي وقال: "كنت عارف إن السر ده هو اللي هيلجمهم، كان لازم يعرفوا إنك إنتي اللي كنتي شايلاهم، مش هما اللي مداريين عليكي."
​بست إيده وقلتله: "إنت من النهاردة أهلي وعيلتي وسندي."
​ياسين نام في الكرسي اللي ورا وهو ماسك في "مخدة الدبل" اللي رفض يسيبها طول الفرح، وكأنه كان عارف إنها كانت تذكرة عبورنا لبر الأمان.
​تمت.
جبايبي البنات هذه القصص لاتمت للواقع ولا لاسلامنا بأي صله هذه قصص مقتبسه من احداث اجنبيه معكم
حكايات صافي هاني