جوزي بيصرف علي اخته

التطبيقات، الكروت.
كل ضغطة زر كانت كأنها بتقفل باب في وشه.
إنتِ كده بتخربي البيت! قالها بصوت مبحوح.
ردت من غير ما تبص له
البيت خرب من يوم ما قررت تبقى بنك مفتوح لأختك على حسابي.
اطمن من النهارده مفيش ميزانية مشتركة.
فيه فلوسك وفلوسي.
وشوف بقى هتعرف تعيش بمرتبك إزاي.
قفلت اللاب بعنف خفيف وخرجت من الأوضة، سايباه واقف لوحده وسط الخراب.
ليلتها الأكل كان صامت.
ندى أكلت لوحدها وهي بتقرأ الرواية الجديدة، كأنه مش موجود أصلًا...أما كريم فكان تايه في الشقة زي واحد فقد سلطته فجأة.
وفجأة موبايله رن.......
الصوت كان عالي ومزعج في وسط السكون اللي ندى فرضته ببرودها. كريم اتنفض، كأنه كان مستني طوق نجاة، لكن لما بص على الشاشة، ملامحه زادت ارتباك.

كانت رانيا.
ندى ما رفعتش عينها من الرواية، بس ودنها كانت معاه.
أيوة يا رانيا.. قالها كريم بصوت واطي ومكتوم وهو بيبعد ناحية البلكونة.
لا.. لا مش دلوقتي.. قولتلك الصبح هكلمك.. قولتلك ظروف الشغل صعبة يا رانيا!
صوت رانيا كان طالع من السماعة حاد وعالي لدرجة إن ندى سمعت جملة يعني إيه يا كريم؟ أنا حجزت الكورس ومحتاجة باقي المصاريف النهاردة، إنت مش قولت إن الأمور تمام؟
كريم قفل السكة بسرعة كأنه بيهرب من فضيحته، وبص لندى اللي قلبت الصفحة بمنتهى الهدوء، وسألت ببرود وهي لسه باصة في الكتاب
الكورس غالي المرة دي؟ ولا ده قسط الموبايل الجديد اللي جابته الشهر اللي فات بفلوس المانيكير والخروجات اللي كنت بتعايرني بيهم؟
كريم حس بدمه بيغلي، مابقاش لاقي قناع يلبسه، فانفجر بالمنطق الوحيد اللي حيلته
إنتي إيه؟ مابتحسيش؟ دي أختي الوحيدة، أبويا مات ووصاني عليها.. عايزاني أسيبها محتاجة وأنا موجود؟
ندى قفلت الرواية ببطء، المرة دي قامت وقفت، وقربت منه لغاية ما بقت قدامه مباشرة.
توصيك عليها من جيبك يا كريم، مش من شقايا. الرجولة اللي بتتحجج بيها دي معناها إنك تروح تشتغل شغلانة تانية، تسهر، تتعب، توفر من مصاريفك إنت.. مش تسحب من رصيدي وتعمل بيهم باشا وتيجي في الآخر تحاسبني على تمن رواية!
أنا كنت برد الفلوس دي لما الأمور تتحسن!
كذاب. قالتها ندى وهي بتبتسم ابتسامة وجعت كبرياءه. إنت كنت ناوي تفضل عايش في الدور ده للأبد. بس اللعبة خلصت. بكرة الصبح، توكيل البنك اللي كنت عاملاهولك هيتلغي، وعربية الشركة اللي إنت راكبها، اللي هي أصلاً قسطها بيطلع من حسابي، مفتاحها يتحط على الترابيزة دي.
كريم صوته اتشرخ إنتي بتذليني يا ندى؟ بتبعي سنيننا عشان خاطر شوية ورق؟
أنا بشتري اللي فاضل من كرامتي يا كريم. السنين اللي إنت ضيعتها وإنت بتمثل عليا دور المصلح الاجتماعي والمفتش المالي وهي أصلاً كانت نصب عاطفي.
سابته ودخلت أوضتها، وسمعت صوت رنة تانية من موبايله، وصوت رانيا وهي بتزعق في السبيكر، وصوت كريم وهو بيحاول يخترع كذبة جديدة يداري بيها إن البنك قفل أبوابه للأبد.
نامت ندى ليلتها لأول مرة من سنين وهي مش حاسة بالذنب، والتحقيق اللي كان كريم بيعمله معاها كل ليلة، اتحول في ليلة واحدة لمحاكمة هو فيها المتهم الوحيد.. والمحكوم عليه بالفقر اللي كان هربان منه بفلوسها